.

له‌یلا زانا به‌ دوو ساڵ سزای گرتووخانه‌ مه‌حکووم کرا

دۆزگه‌ری شاری ئامه‌د "دیاربه‌کر"ی سه‌ربه‌ ده‌وڵه‌تی تورکیا، به‌بیانوی ئه‌وه‌ی ساڵی ڕابردوو پروپاگه‌نده‌ی بۆ ڕێکخراوێکی نایاسایی کردوه‌ سزای دووساڵ زیندانی بۆ په‌رله‌مانتاری پێشوی ده‌پ و سیاسه‌تمه‌داری ناسراوی کورد له‌یلا زانا بڕیه‌وه‌.ئه‌ندامی په‌رله‌مانی تورکیا له‌سه‌ر لیستی پارتی "ده‌پ"ی پێشو و سیاسه‌تمه‌داری ناسراوی کورد له‌یلا زانا که‌ پێشتر له‌به‌ر ئه‌وه‌ی له‌ مه‌راسیمی سوێندخاردندا به‌ کوردی قسه‌ی کردبوو 9 ساڵ له‌ زیندان مابوه‌وه‌، ئه‌مجاره‌ به‌ دۆزێکی دیکه‌ مه‌حکوم کراو سزای 2 ساڵ زیندانی بۆ بڕایه‌وه‌.

سه‌ردۆزگه‌ری کۆماری تورکیا له‌ شاری ئامه‌د پێشتر دۆزێکی له‌ دژی له‌یلا زانا کردبوه‌وه‌، به‌بیانوی ئه‌وه‌ی له‌ نه‌ورۆزی ساڵی ڕابردودا، له‌ کاتی خوێندنه‌وه‌ی وتاره‌که‌ی گوتبووی کوردان خاوه‌نی 3 سه‌رکرده‌ی بران که‌ یه‌کێکیان سه‌رۆک کۆماری عێراق جه‌لال تاله‌بانی، ئه‌وه‌ی دیکه‌یان سه‌رۆکی هه‌رێمی کوردستان مه‌سعود بارزانی و یه‌کێکی دیکه‌شیان عه‌بدوڵا ئۆجالانه‌.

ئه‌مڕۆ دادگای بڕیاری خۆی له‌مه‌ڕ له‌یلا زانا ئاشکرا کردو که‌ بڕیاره‌که‌ به‌م شێوه‌یه‌ی خواره‌وه‌یه‌:-

په‌رله‌مانتاری پێشوی پاری قه‌ده‌غه‌کراو "ده‌پ" ناسراو به‌ له‌یلا زانا، له‌ ڕۆژی نه‌ورۆزی ساڵی 2007 دا، له‌ دیاربه‌کر گوتارێکی پێشکه‌ش ده‌کات و له‌وێ باس له‌وه‌ ده‌کات که‌ کوردان خاوه‌ن سێ سه‌رکرده‌ی بران، یه‌کێک گوایه‌ له‌و برایانه‌ عه‌بدوڵا ئۆجالانه‌ که‌ به‌ کوشتنی 30 هه‌زار که‌س له‌ تورکیا دادگایی کراو سزای له‌سێداره‌دان پاشان گۆڕا بو سزای تا هه‌تاهه‌تایی بۆی بڕاوه‌ته‌وه‌، به‌م پێیه‌ زانا پێشێلکاری له‌به‌رانبه‌ر یاساکانی کۆماری تورکیا کردوه‌و پروپاگه‌نده‌ی بۆ ڕێکخراوه‌ تێرۆریستیه‌کان کردوه‌، ئێمه‌ وه‌کو دادگای کۆماری تورکیا، به‌پێی ده‌ستوری بنچینه‌یی کۆماری تورکیای گه‌وره‌ داوای سزای دوو ساڵ زیندانی بۆ ئه‌و که‌سه‌ ده‌که‌ین.